Tara Hann
Tara Hann (23), wat aangehou word, staan tereg op ’n aanklag van aanranding met die doel om ernstig te beseer. Sy staan ook afsonderlik tereg op ’n aanklag van diefstal nadat sy glo ’n TV-stel gesteel het.
Hann, ’n ma van een kind, het ’n handstut gedra toe sy by die Bellville-landdroshof se beskuldigdebank ingeskuif het.
Anne Crawcour, haar ouma wat sy glo aangerand het, was ook in die hof. Crawcour het ’n blou oog en merke op haar gesig gehad.
Die staatsaanklaer, Mholo Moathlodi, het aangevoer Hann het ’n beskermingsbevel oortree toe sy op Kersaand opgedaag het by die plek waar haar ouma toe was.
“Die klaer het ernstige beserings opgedoen,” het Moathlodi gesê.
“Die beskuldigde was glo onder die invloed van alkohol.”
Die landdros, Suzette Marais, het aangedui die beskermingsbevel is nog nie amptelik aan Hann beteken nie. Dit is toe gister oor die etensuur gedoen.
Luidens die klagstaat is Crawcour met ’n groot voorwerp in haar gesig en oor haar kop geslaan.
Marais het gesê sy gaan nie in dié stadium ’n aansoek om borgtog aanhoor nie. Sy het die saak tot 12 Maart uitgestel.