Verbied by Onze Rust 1 Julie 2015

1 Julie 2015

Die Voorsitter
Beheerraad Onze Rust Sentrum vir Bejaardes
Steynsrus
Geagte mnr Durandt Joubert
Ek verwys weereens na u skrywes gedateer 22 April 2015 aan my en Petro Beukman en Wanda du Plessis waarin elkeen van ons die terrein van Onze Rust verbied is, asook na my skrywes gedateer 20 en 27 Mei 2015 en 4 Junie 2015 waarin ek die redes vir die verbied versoek het en waarop ek nog steeds geen reaksie gekry het nie.

Ek het sedert my laaste brief die reaksie van die publiek oor hierdie spesifieke aangeleentheid getoets. Die reaksies kan basies in 3 groepe verdeel word:

1. Groep 1 reken dat hierdie aangeleentheid loshande die grap van die jaar is.

2. Groep 2 staan net in ongeloof dat so iets nog moontlik is in hierdie moderne en verligte eeu.

3. Groep 3 se reaksie is dat daar geen twyfel is dat daar nog steeds onheiligheid in Onze Rust plaasvind wat ons nie mag sien nie.

Hierdie reaksies is nie noodwendig ook my opinie nie maar dit maak wel sin.

Ek kan ook net wonder of u ooit my skrywes vanaf Onze Rust ontvang. Om eerlik te wees ek het nie veel vertroue in die administrasie van Onze Rust se kantoor nie.

Die feit dat ek en Petro Beukman verbied is beteken ons het iets verkeerd gedoen in die opinie van die raad en is ons geregtig om te weet waarvan ons beskuldig word. Is dit nie dalk so dat die raad nie hierdie saak goed deurdink het nie en net ‘n blindelingse besluit geneem het nie?

Hoekom word daar nie met my gekommunikeer nie? Ek maak nie stellings nie ek vra vrae:

1. Voel almal by Onze Rust minderwaardig om met my te praat? Sekerlik is dit nie nodig nie, ek sal eerder help, ek verdra maar net nie ‘n onregverdigheid, soos die afdanking van Wanda du Plessis en dan natuurlik die mishandeling van die oumense nie.

2. Is u en almal by Onze Rust en Engo doodeenvoudig net te skytbang om met my te kommunikeer?

Tot tyd en wyl daar op ‘n beskaafde wyse met my gekommunikeer word om hierdie probleem op te los en tot tyd en wyl ek van die rede(s) voorsien word waarom ek en Petro Beukman Onze Rust verbied is, neem ek aan dat ons verbied is omrede al die beweringe van die aanranding en mishandeling van inwoners wel waar is en dat hierdie mishandelings nog steeds voortduur en dat ons dit nie mag sien gebeur nie en is dit dan die boodskap wat ek aan die publiek sal oordra en is dit dan ook wat ek sal publiseer.

Vriendelike Groete

Owen de Scally