Ondersoek na tehuis in Kaapstad nog nie afgehandel
Berig soos verskyn het in News24
Deur Samantha van den Berg Donderdag
20 November 2014 3:00 vm.
Die onafhanklike organisasie Action on Elder Abuse ondersoek steeds Huis
Serendipity in Panorama.Die finale verslag sal vir oorweging aan die Wes-Kaapse departement van maatskaplike ontwikkeling oorhandig word. Dit is al wat Pat Lindgren, direkteur van dié organisasie, gister oor die ondersoek wou sê.
Albert Fritz, Wes-Kaapse minister van maatskaplike ontwikkeling, het dié organisasie gevra om die ondersoek te doen ná ernstige bewerings oor verwaarlosing en mishandeling by die tehuis.
Die tehuis is nie by die departement geregistreer nie, het Fritz vroeër gesê.
Sharon Roberts besit Serendipity.
Sihle Ngobese, Fritz se woordvoerder, het by navraag gesê hulle kan eers volledig oor die saak kommentaar lewer wanneer die ondersoek afgehandel is.
Hy het die publiek versoek om na vore te kom met inligting wat die ondersoek kan help. Indien daar nog klagtes is, kan dit by die departement aangemeld word.
TygerBurger het gister berig die dodetal by die tehuis staan nou op 18. Dié 18 voormalige inwoners is na bewering tussen Junie en Oktober vanjaar oorlede.
Lindgren en Ngobese wou nie gister die getal bevestig nie.
Die tehuis is gemagtig om 28 bejaardes te versorg, het Die Burger vroeër berig.
Anton Basson, ’n inwoner van Melkbosstrand, het intussen sy 77-jarige ma wat aan Alzheimer se siekte ly, uit Serendipity gehaal. Sy is nou in ’n tehuis in Ceres.
Die saak is ontstellend, het hy gesê.
Sy ma is die afgelope ses jaar in Serendipity versorg en verskeie “voorvalle” het uiteindelik daartoe gelei dat hy haar daar weggeneem het.
Sy het die laaste tyd agteruit gegaan en het sowat 40 kg geweeg toe sy by die tehuis in Ceres ingetrek het.
Die Burger het Roberts gister om kommentaar genader, maar sy het gesê sy gaan nie meer die saak met die media bespreek nie.
“Dit is teleurstellend hoe lelik mense kan wees,” het sy gesê.