Beweerde mishandeling van bejaarde
Huis Elsjé.
Die polisie ondersoek 'n saak van emosionele teistering op 'n bejaarde persoon. Die ondersoek is nog in 'n vroeë stadium en niemand is teen druktyd gearresteer nie.
Die bestuurder van Huis Elsjé, mnr Gert Meiring, het die video as bewysstuk by die polisie ingehandig.
Huis Elsjé is 'n huis waar mense wat aan demensia (Alzheimer's) ly, versorg word. Al die vertrekke in Huis Elsjé, behalwe die badkamers, is met kameras toegerus. Dit kos tans R9 350 per maand om 'n familielid by die tehuis te laat versorg.
Die videomateriaal van die teistering, wat op 9 Junie 2014 opgeneem is, duur ongeveer vier minute. Dit beskik nie oor 'n klankgreep nie.
Dit wys hoe die slagoffer, wat in 'n rolstoel uit die badkamer gestoot word nadat sy gewas is, geagiteerd teenoor die personeel optree. Die personeel wil die slagoffer teen haar sin vanuit haar rolstol na 'n stoel oortel, maar sy raak kwaad omdat sy nog in haar rolstoel wil sit.
Die res van Huis Elsjé se inwoners sit ook in die betrokke vertrek en aanskou die teistering.
Die bejaarde slagoffer klap dan 'n vrywillige werker teen die kop, waarna dié werker wegstap. Die inwoner kom daarna steeds geïrriteerd voor. Hierna kan gesien word hoe die hulppersoneel, ten aanskoue van hul skofleier, die slagoffer begin tart.
Die video toon hoe die skofleier, amper soos 'n lappop, tartend deur een van die hulppersoneel tot voor die slagoffer se gesig gedruk en weer weggeruk word. Direk daarna kan gesien word hoe die personeel teenwoordig vir die slagoffer lag en die situasie amusant vind.
Dit wil voorkom asof die slagoffer nie wil hê die saalhulpe aan haar moet raak nie. Tog tart die saalhulpe haar steeds deur by herhaling voor te gee dat hulle aan haar gaan raak.
Die slagoffer sit hulpeloos terwyl die getartery voortduur. Op 'n stadium los die saalhulpe haar in vrede, net om na enkele oomblikke weer met die getreiter te begin.
Daar kan duidelik op die video gesien word hoe die personeel vir die vrou lag en die skofleier stap ook laggend weg terwyl die slagoffer byna buite haarself van emosie is.
Voorsitter praat
Die voorsitter van die ACVV Mosselbaai, Marietjie Knoetze, het die Mossel Bay Advertiser te woord gestaan na die beweerde teistering deur die bestuurder van die huis, mnr Gert Meiring, aan die polisie gerapporteer is.
Die skofleier het blykbaar reeds voor die voorval haar bedanking ingegee en is na die verhoor onmiddelik ontslaan sonder dat sy haar kennistydperk moes klaar werk.
Die ander personeellid het 'n finale waarskuwing gekry en werk steeds by die huis.
"Die rede vir die verskillende uitkomste van die dissiplinêre verhore is dat die saalhulp nog nuut in die werk is en nog nie die totale opleiding deurloop het nie. Sy het onder leiding van die skofleier, wat 'n gekwalifiseerde en geregistreerde stafverpleegster is, gewerk.
"As verswaring by die stafverpleegster se verhoor, is die feit dat sy nie slegs mediese opleiding gehad het nie, maar ook ons Alzheimer-opleiding deurloop het, en van beter geweet het as om die gedrag te laat voortduur," sê Knoetze.
Knoetze sê hul keur die voorval ten sterkste af.
"By Huis Elsjé is dit vir ons belangrik dat ons inwoners met integriteit en respek behandel word, en dat hulle menswaardigheid nie aangetas word nie.
Dit kan nie geduld word dat 'n inwoner geterg en uitgelok word om haarself onwaardig te gedra om die personeel te vermaak nie.
"Geen vorm van mishandeling sal geduld word nie."
Volgens Knoetze word 'n personeellid soos in dié geval, se naam in ooreenstemming met die bepalings van die Wet op ouer persone (Wet 13 van 2006) in 'n register aangeteken, en sal haar kanse om weer werk as versorger te kry, glo skraal wees.
Teen druktyd kon die Mossel Bay Advertiser nie vasstel waar die voormalige skof-leier tans werk nie, alhoewel daar gerugte is dat sy voor die voorval werk gekry het by 'n hospitaal in Knysna.