Tehuis-skok: Gesin vertel van ma (87) se bedsere, septisemie
Berig soos verskyn het in News24
Deur Samantha van den Berg Donderdag
20 November 2014 10:14 vm.
Linda en Frank Burger van die Paarl sukkel steeds om die
dood van Linda se bejaarde ma te verwerk nadat sy vroeër vanjaar met gevorderde
bedsere en septisemie in die hospitaal opgeneem is. Sy is voor haar dood sowat
vyf jaar lank in Huis Serendipity versorg. Hier is die Burgers saam met hul
dogters, Chandré en Simoné. Foto: LEáNNE STANDER
’n Bolandse vrou sal eers berusting oor haar ma se dood hê wanneer die
ondersoek na die Kaapse tehuis waar sy versorg is, afgehandel is.“Hierdie hele storie het my ’n ander mens gemaak . . . só negatief. Ek dink nie ek sal ander mense ooit weer kan vertrou nie,” het Linda Burger gesê.
Haar ma, Lana van Zyl (87), is een van 18 inwoners van Huis Serendipity in Panorama wat sedert Junie oorlede is.
Die tehuis word nou deur Action on Elder Abuse ondersoek.
Burger het dié week vertel haar ma is meer as vyf jaar lank in die tehuis versorg, maar op 23 Augustus in ’n kritieke toestand in die Mediclinic Panorama opgeneem.
Burger het twee weke vantevore nog by haar ma gekuier en was geskok om daardie dag in die hospitaal uit te vind haar bejaarde ma se liggaam is met septisemie deurtrek weens gevorderde bedsere.
Van Zyl het ’n gat van sowat 4 cm diep op haar rug gehad, en haar linkervoet was glo nog net aan die achilles-tendon en hoofslagaar geheg. Sy was ondervoed, gedehidreer en haar doek was meer as ’n dag lank vuil, het Burger gesê.
Die familie is na bewering nooit van die bedsere laat weet nie, en haar ma het ook nie meer gepraat nie.
Die mediese personeel by die hospitaal het aanvanklik gedink sy gaan nie eens die nag oorleef nie. “Maar my ma het hard teruggeveg. Haar dokter en verpleegsters was geskok oor haar toestand en het my aangemoedig om die saak verder te neem.”
Van Zyl het minstens drie bloedoortappings gekry en antibiotika en morfien is toegedien. Haar linkerbeen is drie weke later geamputeer.
Van Zyl is meer as ’n maand lank in die hospitaal behandel, maar het eindelik op 14 Oktober weens septiese skok gesterf. “Ons het elke tweede naweek by haar gaan kuier. Die laaste keer dat ek haar in die tehuis gesien het, was sy swak. Ek het egter nie in daardie stadium opgemerk dat daar iets ernstigs met haar fout is nie. Sy het dik klere aangehad en haar been was styf toegedraai.”
Volgens Frank Burger, Linda se man, is die situasie steeds baie ontstellend vir sy gesin. “Die hele voorval maak iets in jou wakker wat jy nie wil wees nie.”